Visionen für die Zukunft PDF

Platt - de Spraak för de Tokunft

De Staat hett ünnerschreven: He will sik för Platt insetten. Bund un Länner sünd tostännig för Platt - un ok verantwortlich. Wat aver kann de Politik doon un wo kann de Bundesraat wat anschuven?

 

De Staat kann helpen, dat mehr Platt in dat öffentliche Leven rinkummt un as Stück vun de norddüütsche Kultur annahmen warrt: Ortsschiller op Hooch un Platt - Ünnerricht in un över Platt, denn för de Bildung leist düsse Spraak so veel as all de annern ok - Platt ok för eernsthafte Themen in Radio un Fernsehn.

Düsse Arbeit geiht nich ganz ahn Gesetzen un Verordnungen. Denn dat Recht, Platt as normale Amtsspraak to bruken, gellt eerst, wenn dat swatt op witt op't Papeer steiht. So hebbt bet nu twee norddüütsche Länner den Schutz vun dat Plattdüütsche mit in jümehr Verfaten opnahmen. De Minschen höört Platt geern. Un mehr un mehr Minschen snackt ok wedder Platt op de Straat oder op't Amt. Man noch sünd wi nich so wiet, dat all Lüüd weet: dat is goot, wenn jeedeen mehr as een Spraak kann. Dorüm is dat ok so heel wichtig, dat wi an Platt fasthoolt. Un dat wi Platt an de Kinner un de Enkelkinner wiedergeevt.


... de Stimm vun de Plattdüütschen

Millionen Minschen in Düütschland snackt Platt, un dat in acht Bundeslänner. De Bundesraat för Nedderdüütsch kümmert sik üm de ehr Interessen. He maakt Politik för Platt.
In de Bundeslänner, bi'n Bund in Berlin un ok bi den Europaraat in Straßborg - överall passt de Bundesraat dorför op, dat de Regionalspraak Plattdüütsch to ehr Recht kummt.
In den Bundesraat sitt twee Lüüd ut jeedeen Bundesland binnen, wo Minschen Platt snackt, dorto een vun de Plautdietschen.


Plattdüütsch un Politik

Siet 1999 gellt in Düütschland de "Europäische Charta der Regional- oder Minderheitensprachen". Düsse Verdrag is internatschonaal Rechtsgoot. He schall dorför sorgen, dat dat mit dat Plattdüütsche nich wieder bargdaal geiht.

Dat heet:

  • mehr Platt in'n Kinnergoorn, in Scholen un Hoochscholen - dorför sett sik de Staat in un de Bundesraat helpt em dorbi;
  • in Amtsgeschäften, vör Gericht un in de Wirtschaft oder in dat soziale Leven - överall gellt Platt jüst so veel as Hoochdüütsch;
  • mehr Platt in de Kultur un in de Medien - ahn Wenn un Aver höört Platt mit dorto.

Dat dat bargop geiht mit Platt, dorför mööt de Bundeslänner Hand in Hand arbeiten. Dat stött de Bundesraat an. Un he passt dorför op, dat dor ok wat bi rutkummt.


Platt vundaag: Een Regionalspraak in Europa

Överall in Europa passt Lüüd dorför op, dat de "lütten" Spraken un Kulturen nich ünnerplöögt warrt. Blangen de groten Amtsspraken gifft dat tominnst 60 "lütte" Spraken. Se all höört to de Minschen as dat Solt in de See. Un all hebbt se jümehr egen Kultur: mit Literatur, Singen, Theater un so.
Klor, dat de Bundesraat mit dat "Europäisch Büro för Spraken, de nich so veel bruukt warrt" (eblul) tohooparbeit.


De Bundesraat sett sik in för mehr Spraken in Düütschland. Un vör allen för mehr Platt. Denn Platt is nu maal de Spraak, de bi uns in Norddüütschland to Huus is. Un so schall dat ok blieven.

 

© 2017 Bundesraat för Nedderdüütsch